«Yosh iste’dodlarni qo‘llab-quvvatlash yo‘lida birinchi onlayn auksion» respublika badiiy tanlovi
5-Noyabr, 2026-yil 12:51
San’at g‘oyadan, imkoniyatlar esa birinchi qadamdan boshlanadi.
Yosh rassomlar va hunarmandlar uchun professional art-bozor, ko‘rgazma loyihalari hamda xalqaro auditoriyaga yo‘l ochuvchi tanlov.
Tanlov haqida
“Yosh iste’dodlarni qo‘llab-quvvatlash yo‘lida birinchi onlayn-auksion” respublika badiiy tanlovi – Art Vernissage auksion uyining tashabbusi bo‘lib, tasviriy va amaliy bezak san’ati sohasida ijod qilayotgan yosh rassomlar, hunarmandlar va mualliflarni aniqlash hamda qo‘llab-quvvatlashga qaratilgan.
Tanlovning maqsadi — yosh ijodkorlarning kasbiy rivojlanishiga ko‘maklashish, ijodiy salohiyatini yuzaga chiqarish hamda ularning asarlarini onlayn auksion orqali, jumladan, xorijda ham rasmiy tartibda sotish uchun imkoniyat yaratish.
Tashkilotchi va hamkorlar
Tashkilotchi:
- Art Vernissage auksion uyi.
Hamkorlar:
- O‘zbekiston Badiiy akademiyasi;
- O‘zbekiston “Amaliy san’at” ijodiy uyushmasi.
Kimlar ishtirok etishi mumkin?
Tanlovda O‘zbekistonning barcha hududlaridan mualliflar ishtirok etishlari mumkin. Tanlov uch toifada o‘tkaziladi:
Maktab o‘quvchilari
Ixtisoslashtirilgan san’at maktablarining 10–11-sinf o‘quvchilari.
Talabalar
San’at yo‘nalishlarida tahsil olayotgan 1–4-bosqich talabalari.
Yosh iste’dodlar
18 yoshdan 24 yoshgacha bo‘lgan, maxsus san’at ma’lumotiga ega yoki ega emasligidan qat’i nazar, tasviriy yoki amaliy bezak san’ati bilan shug‘ullanuvchi mualliflar.
Tanlovda ishtirok etish ixtiyoriy va bepul. Har bir muallif faqat bitta ishni tegishli toifalardan biri bo‘yicha taqdim etishi mumkin.
Mavzu yo‘nalishlari
Ishtirokchilar tanlov ishini taqdim etish uchun quyidagi to‘rt mavzu yo‘nalishdan birini tanlashlari lozim:
• «O‘zbekiston lazzatlari»;
• «San’at va zamon»;
• «Rang va yorug‘lik orasida»;
• «O‘zbekiston madaniy me’rosi».
Qanday ishlar qabul qilinadi?
Tanlovga faqat ishtirokchining o‘zi yaratgan original asarlar qabul qilinadi.
Tasviriy san’at:
- rangtasvir;
- grafika va rasm;
- haykaltaroshlik;
- aralash texnikadagi asarlar;
- tasviriy san’atning boshqa turlari.
Amaliy bezak san’ati:
- kulolchilik;
- badiiy to‘qimachilik;
- kashtachilik;
- o‘ymakorlik;
- yog‘och va metallga badiiy ishlov berish;
- zargarlik san’ati;
- amaliy bezak san’atining boshqa turlari.
Muhim!
Tanlov ishini yaratishda sun’iy intellekt, kompyuter dasturlari va boshqa texnik vositalardan foydalanishga yo‘l qo‘yilmaydi. Tayyor asarning raqamli fotosuratlariga ishlov berishga faqat Nizomda belgilangan doirada ruxsat etiladi.
Qanday ishtirok etish mumkin?
Arizalar faqat tanlovning rasmiy Telegram-boti orqali qabul qilinadi.
Ariza topshirish bosqichlari
1. Toifa va yo‘nalishni tanlang
Ishtirok etish toifasini va to‘rtta mavzu yo‘nalishidan birini belgilang.
2. Tanlov ishini tayyorlang
Asarning kompozitsiyasi, ranglari, mayda detallari va fakturasini aniq ko‘rsatuvchi sifatli fotosuratini tayyorlang.
3. Arizani to‘ldiring
Muallif va asar haqidagi ma’lumotlarni kiriting, qisqacha tarjimayi hol va asar tavsifini qo‘shing.
4. Materiallarni Telegram-bot orqali yuboring
Asarning raqamli tasvirini, shuningdek, zarur tasdiqlovchi hujjatlar va roziliklarni ilova qiling.
5. Moderatsiya natijalarini kuting
Materiallar tekshirilgandan so‘ng ariza ekspert baholashiga qabul qilinadi yoki qayta ishlash uchun qaytariladi yoxud sababi ko‘rsatilgan holda rad etiladi.
G‘oliblar uchun imkoniyatlar
30 nafar g‘olib. Ijod uchun yangi imkoniyatlar.
Tanlov yakunlariga ko‘ra, har bir toifa bo‘yicha 10 nafardan, jami 30 nafar g‘olib aniqlanadi.
Art Vernissage galereyasida ko‘rgazma
G‘oliblarning asarlari Tashkilotchi hisobidan ko‘rgazmaga tayyorlanadi va yosh mualliflarning ijodi bilan tashrif buyuruvchilar hamda salohiyatli xaridorlarni tanishtirish maqsadida namoyish etiladi.
Art Vernissage platformasida e’lon qilinishi
Muallifning tarjimayi holi, ijodiy faoliyati va tanlovga taqdim etgan asari haqida alohida ma’lumot beriladi.
Xalqaro onlayn-auksionda ishtirok etish
Tanlov g‘oliblarining asarlari qo‘shimcha tekshiruvdan o‘tkazilib, sotish shartlari kelishilgach, O‘zbekiston va boshqa mamlakatlar xaridorlari uchun ochiq xalqaro onlayn auksionga qo‘yiladi.
Auksion savdolari davomida asarlari muvaffaqiyatli sotilgan mualliflarga auksionning bosma katalogi hamda san’at asari yosh iste’dodlarni qo‘llab-quvvatlashga qaratilgan birinchi onlayn-auksionda sotilganini tasdiqlovchi rasmiy sertifikat topshiriladi.
Diplom va sertifikatlar
G‘oliblar diplomlar va qimmatbaho sovg‘alar bilan taqdirlanadi.
Arizasi ro‘yxatga olingan va tanlovda qatnashishga ruxsat berilgan har bir ishtirokchiga elektron sertifikat beriladi.
Mualliflar uchun qo‘shimcha imkoniyatlar
Agar tanlov ishi onlayn-auksionda muvaffaqiyatli sotilsa, g‘olibga boshqa beshtagacha asarini bir yil muddatga sotuvga bepul joylashtirish imkoniyati beriladi. Bu alohida shartnoma asosida amalga oshiriladi.
E’tibor bering!
Tanlovda g‘olib bo‘lish asarning sotilishini kafolatlamaydi. Asarning onlayn-auksionda ishtirok etishi, moliyaviy shartlar, hisob-kitoblar va asarni topshirish muallif hamda auksion uyi o‘rtasida tuziladigan alohida shartnoma asosida rasmiylashtiriladi.
ARIZALARNI QABUL QILISH
2026-yil 1–20-noyabr
Ro‘yxatdan o‘tish tanlovning rasmiy Telegram-boti orqali amalga oshiriladi.
O‘zbekiston san’atining yangi avlodi safiga qo‘shiling!
Sizning asaringiz professional ijodiy faoliyat yo‘lidagi ilk qadamga aylanishi, keng auditoriya e’tirofiga sazovor bo‘lishi va xalqaro art-bozorga chiqishi mumkin.
O‘z asaringizni tayyorlang, mavzu yo‘nalishini tanlang va belgilangan muddatlarda ariza topshiring.
Ishtirok etish uchun ariza topshirish — Telegram-bot havolasi.
Ro‘yxatdan o‘tish tanlovning rasmiy Telegram-boti orqali amalga oshiriladi.
Tanlovning rasmiy Nizomi
Ishtirokchilarga tanlovni o‘tkazishning to‘liq shartlari, asarlarga qo‘yiladigan talablar, ariza topshirish tartibi va onlayn-auksionda ishtirok etish qoidalari bilan tanishib chiqish tavsiya etiladi.
🎨 O‘z iste’dodingizni namoyon qiling va ijodingiz bilan yangi cho‘qqilarni zabt eting!
21-Noyabr, 2023-yil 13:45
Ikkinchi auksion katalogi tayyorlandi
"O'zbekiston amaliy san'at ustalarining madaniy merosi" mavzusida 2-auksion katalogi tayyorlandi
27-Iyun, 2024-yil 17:35
ELLE O'ZBEKISTON bizning mehmonimiz
Bizga ELLE O'ZBEKISTON bosh direktori Olga Shavrina tashrif buyurdi.
5-May, 2023-yil 23:01
Birinchi auktsion o'tkazildi!
Joriy yilning 3 may kuni Toshkentda, Intercontinental Tashkent mehmonxonasining Ball Room zalida "ART VERNISSAGE" auksion uyi va "ART APPRAISAL CENTER" baholash kompaniyasi tomonidan O'zbekiston badiiy akademiyasi va O'zbekiston rassomlar uyushmasi bilan birgalikda "O'zbekiston tasviriy san'at ustalarining ijodiy merosidan" mavzusida O'zbekiston tasviriy san'at ob'ektlarining birinchi auksioni bo'lib o'tdi.